Færslan var fyrst birt á Moggabloggi höfundar 16.6.2010. Efnisflokkur: Gengislánadómar
Ég vil vekja athygli á því að Hæstiréttur mun kveða upp dóma í tveimur bílalánamálum í dag. Dómarnir verða birtir á vef réttarins k. 16.00 og verður að finna hér. Ég mun að sjálfsögðu fjalla um dómana síðar í dag.
Málin sem um er að ræða eru:
92/2010 Óskar Sindri Atlason (Björn Þorri Viktorsson hrl.) gegn SP. fjármögnun hf. (Sigurmar K. Albertsson hrl.)
og
153/2010 Lýsing hf. (Sigurmar K. Albertsson hrl.) gegn Jóhanni Rafni Hreiðarssyni og Trausta Snæ Friðrikssyni (Ragnar Baldursson hrl., Ólafur Rúnar Ólafsson hdl.)
(Mun ég setja tengla inn um leið og þeir verða aðgengilegir.)
Viðbót:
Á vef RÚV var birt viðtal við Gylfa Magnússon, efnahags- og viðskiptaráðherra. Finnst mér rétt að afrita þá frétt hér inn, þó hægt sé að nálgast hana á vefnum.
Gylfi Magnússon efnahags- og viðskiptaráðherra segir að ríkisstjórnin sé viðbúin því að grípa til lagasetningar, þyki ástæða til, í kjölfar dóms Hæstaréttar um lögmæti gjaldeyrisbindingar lána. Hann vill þó ekki staðfesta að lagafrumvarp sé tilbúið né að gripið verði til setningar bráðabirgðalaga. Hugsanlegt er að Alþingi verði kallað saman úr sumarleyfi til að fjalla um málið.
Hæstiréttur fjallar um tvö mál, þar sem héraðsdómur dæmdi annars vegar gengisbindinguna lögmæta, hins vegar ólögmæta. Óvissa er því talsverð um hvað verði ofan á. Einn möguleikinn er að gjaldeyrisbinding lána verði dæmd ólögmæt, en að öðru leyti ekki hróflað við skilmálum. Það myndi þýða að upphafleg krónutala lánanna gildi að teknu tilliti til afborgana og vaxta. Dæmi Hæstiréttur svo, lækkar höfuðstóll gengisbundinna lána verulega. Eins og fram kom í fréttum á föstudag telja allir stóru bankarnir að þeir muni þola slíkan dóm, en hann yrði þó kostnaðarsamur fyrir þá. Gert er ráð fyrir að Hæstiréttur kveði upp dóm sinn á næstu dögum.
Gylfi Magnússon segir ríkisstjórnina hafa hugað að öllum möguleikum varðandi niðurstöðu Hæstaréttar, en hann segir ekki hafa verið gengið svo langt að bráðabirgðalög séu tilbúin til undirritunar. „Það er ekki til neitt tilbúið lagafrumvarp en við teljum okkur vita að ef það þyrfti að koma til lagabreytingar hvernig hún þyrfti að verða,“ sagði viðskiptaráðherra.
Hann segir ótímabært á meðan dómur er ekki fallinn að segja nánar til um hvernig brugðist verði við. En, dæmi Hæstiréttur einfaldlega gengisbindinguna ólögmæta, yrði það áfallið innan þolmarka fyrir bankana en það yrðu þó ekki góðar fréttir frá þeirra sjónarhóli.
Þó að ríkisstjórnin telji ástæðu til lagabreytinga í kjölfar dómsins er þó alls ekki sjálfgefið að það verði gert með bráðabirgðalögum. Samkvæmt upplýsingum Fréttastofu er einnig rætt um að Alþingi verði þá kallað saman, úr sumarleyfi, til að fjalla sérstaklega um þetta mál.
Höfum síðan í huga, að Gylfi fékk í hendur lögfræðiálit í júní árið áður, þar sem niðurstaðan var sú sem Hæstiréttur komst að. Hann ákvað að sitja á þessu áliti, snúa úr út niðurstöðu þess í þingsal og þannig í raun draga málin á langinn.