Sóttin breiðist út - Stemmum stigum við henni áður en það verður um seinan

Færslan var fyrst birt á Moggabloggi höfundar 22.2.2012. Efnisflokkur: Skuldamál heimilanna

Sú sótt sem lagst hefur á okkur Íslendinga er farin að dreifa sér víða.  Hjá okkur kom hluti höggsins strax vegna gengistryggingarinnar.  Fólkið með verðtryggðu lánin eru farin að finna fyrir hitanum og þar mun bara hitna undir pottinum.

Grikkir og Spánverjar eru líka farnir að taka sóttina ógurlegu, þar sem illa rekið fjármálakerfi ber enga ábyrgð.  Nei, það er almúginn sem tekur skellinn.  Spánverjar eru greinilega að átta sig á því að við svo verður ekki búið.  90 þúsund fjölskyldur hafa verið bornar út á rétt innan við tveimur árum.  Það samsvarar 450 íslenskum!   Ég veit ekki hver talan er hér á landi.  Kannski er hún hærri og kannski er hún lægri.  Þar á að innleiða lyklafrumvarpið, en hér heykjast menn endalaust við það.

Hættum að finna fyrir meðaumkun með fjármálafyrirtækjum sem ekki kunnu fótum sínum fjörráð.  Tökum manngildi ofar auðgildum.  Án viðskiptavina verða engin fjármálafyrirtæki.

Ég tilheyri stórum hópi fólks sem hefur í hátt í fjögur ár barist fyrir réttindum venjulegra fjölskyldna.  Til að byrja með vorum við kölluð óráðsíufólk og enn þann dag í dag koma fram siðapostular sem kalla okkar fjárglæfrafólk.  Margir þeirra átta sig ekki á því að sóttin sem herjað hefur á stóran hluta landsmanna getur náð til allra áður en yfir lýkur, ef ekki er ráðist gegn henni.  Ávinningurinn er mun meiri en kostnaðurinn þegar til lengri tíma er litið.  Kostnaður núna verður alltaf minni en kostnaðurinn í framtíðinni, ef sóttin fær að gerjast.

Stemmum stigum við henni áður en hún verður orðin svo skæð að við hana verður ekki ráðið.  Hún er þegar búin að leggja fólk, fjölskyldur og fyrirtæki að velli.  Þeir veikustu féllu fyrst.  Og með hverju fórnarlambi vex henni ásmegin, þannig að fleiri sogast í fang hennar þaðan sem fáir losna.  Hvert sem litið er, sér maður fólk, fjölskyldur og fyrirtæki sem eru helsjúk vegna þess að fjármálastarfsemi þarf eingöngu að taka ábyrgð að því marki sem það hentar fjármálafyrirtækjunum.  Skilja þau ekki að þau eru þegar smituð af sóttinni og haldi þau sínu striki verður önnur kollsteypa.  Sú næsta, Guð forði okkur frá henni, verður helmingi verri en sú síðasta.

Færslan var skrifuð við fréttina: Reynt að forða útburði